ZIARA YA WAZIRI MKUU -MTAMA DC

Posted on: October 5th, 2021

Waziri Mkuu wa Jamhuri ya Muungano wa Tanzania ambae pia ni Mbunge wa Jimbo la Ruangwa Mh. Kassim Majaliwa Majaliwa leo tarehe 5 Oktoba, 2021 amefanya ziara yake ya kikazi katika Wilaya ya Lindi yenye Halmashauri mbili ambazo ni Halmashauri ya Wilaya ya Mtama na Halmashauri ya Manispaa ya Lindi kwa lengo la kutembelea na kukagua Miradi mbalimbali ya maendeleo.

Kwa upande wa Halmashauri ya Wilaya ya Mtama Mh. Waziri Mkuu alifanikiwa kutembelea Mradi wa barabara ya Hingawali hadi Navanga yenye urefu wa Km 14.1, Navanga hadi Pangatena yenye urefu wa Km 8 ambao umegharimu kiasi cha Tsh. 299,926,100.00/=. Sambamba na hilo Mh. Majaliwa alipata nafasi ya kuwahutubia wananchi wa Hingawali kwa kuwapa salamu kutoka kwa Rais wa Jamhuri ya Muungano wa Tanzania Mh. Samia Suluhu Hassan na kutolea ufafanuzi wa changamoto zilizotolewa na Mbunge wa Jimbo la Mtama  Mh. Nape Mosses Nnauye kwa niaba ya wananchi hao kuhusu swala la umeme na kusema kuwa Serikali imejipanga kusambaza umeme katika vijiji vyote nchini huku akisisitiza bei elekezi ya umeme ambayo ni  shilingi 27,000/=.

Mh. Waziri Mkuu alizungumza na watumishi wa Halmashauri ya Wilaya ya Mtama na kuwapa maelekezo ya utendaji kazi ikiwa ni pamoja na uadilifu, uaminifu na kutumia utaalamu wao na kutoa wito kwa watumishi hao kusimamia vema mapato na matumizi  ili kuleta maendeleo ndani ya Halmashauri na Taifa kwa ujumla.

Kufuatia ziara hiyo, Mkurugenzi Mtendaji wa Halmashauri ya Wilaya ya Mtama Ndg. George Emmanuel Mbilinyi alipata fursa ya kusalimiana na Mbunge Mstaafu Mh. Bernard Membe na kumpongeza Mkurugenzi huyo kwa uteuzi alioupata huku akimuhakikishia kutoa ushirikiano katika utekelezaji wa majukumu kwa lengo la kuleta maendeleo kwenye Jimbo na Halmashauri kwa ujumla. Aidha, Mh. Membe amempongenza Rais wa Jamhuri ya Muungano wa Tanzania Mh. Samia Suluhu Hassan kwa kazi anazozifanya ikiwa ni pamoja na kutoa fedha za maendeleo kwa ajili ya Miradi mbalimbali ya maendeleo katika Tarafaa ya Rondo.

Mh.Waziri Mkuu anaendelea na ziara ya kikazi katika Wilaya zote za Mkoa wa Lindi iliyoanza leo tarehe 05/10/2021 mpaka tarehe 09/10/2021.

Mh. Bernard Membe akizungumza na Mkurugenzi wa Halmashauri ya Wilaya ya Mtama Ndg.George Mbilinyi (aliyevaa suti) walipokutana katika shule ya sekondari Mnara- Rondo wakati wa ziara ya Waziri Mkuu.