DED MTAMA AKUTANA NA VIONGOZI WA VYAMA VYA MSINGI NA KUWAPA MAELEKEZO

Posted on: October 6th, 2021

Mkurugenzi Mtendaji wa Halmashauri ya Wilaya ya Mtama Ndg. George Emmanuel Mbilinyi leo 6 Ocktoba 2021 amekutana na kuzungumza na viongozi wa Vyama vya Msingi pamoja na viongozi wa Ghala la kuu la Lindi Farmers Limited lililoko Mtama  ili kutoa mwongozo wa usimamizi mzuri wa zao la Korosho kutoka kwa Mkulima hadi kumfikia mnunuzi na kwamba kwa kufanya hivyo kutaimarisha Vyama vilivyopo ndani ya Halmashauri na kuleta ushindani nzuri katika soko. 

Kikao hicho kilifanyika katika Ukumbi wa Mikutano wa Halmashauri na kuhudhuriwa na Mbunge wa Jimbo la Mtama Mh. Nape Mosses Nnauye, Mwenyekiti wa Halmashauri Mh. Yusuf Abdallah Tipu, Mkurugenzi Mtendaji wa Halmashauri ambae alikua Mwenyekiti wa kikao pamoja na  Mtendaji wa Bodi ya usimamizi wa Stakabadhi Ghalani Ndg. Asangye Bangu.

Miongoni mwa maelekezo aliyoyatoa Mkurugenzi wa Halmashauri kwa viongozi hao  ni pamoja na:

1. Viongozi wa vyama vya Msingi wafikishe taarifa ya kikao kwa wakulima kuhusu uzalendo wa kupeleka mavuno yao katika ghala la Mtama ili kuinua mapato ya Halmashauri.
2.  Kusimamia na kudhibiti kikamilifu ubora wa zao la  Korosho ili kuleta ushindani katika soko
3. Kujiepusha na vitendo vya Rushwa hususani wakati wote  wa msimu wa Korosho.
4. Kufanya kazi kwa uaminifu, uvumilivu, umakini na uzalendo.

Lakini pia wajumbe wa kikao walipata nafasi ya kujadili changamoto zinazowakabili katika utekelezaji wa majukumu yao ikiwa ni pamoja na udanganyifu wa Mzani mdogo wa Tani 5 huku Mkurugenzi Mtendaji wa Halmashauri Ndg. George Mbilinyi akitoa agizo kwa Afisa Ushirika na Mwendesha Ghala la Farmers kulipatia suluhisho suala hilo.

Viongozi wa Vyama vya Msingi wakiwa kwenye kikao hicho.