MAAMBUKIZI YA MALARIA YAPUNGUA KWA 8.2% MTAMA.

Posted on: April 25th, 2024

Siku ya Malaria Duniani ni maadhimisho ya kimataifa yanayoadhimishwa kila mwaka ifikapo Aprili 25 ili kutambua juhudi za kimataifa za kudhibiti Malaria, kufuatia maadhimisho hayo Ndugu Marcelina Mangula Kaimu Mratibu wa Malaria wa Halmashauri ya Wilaya ya Mtama amethibitisha kupungua kwa maambukizi ya malaria kwa 8.2% kutoka 16.8% mwaka 2022 hadi 8.6% mwaka 2023.

Kupungua kwa Maambukizi hayo ni kutokana na juhudi mbalimbali zinazofanywa na  serikali ya awamu ya sita chini ya Mheshiwa Rais daktari Samia Suluhu Hassani ambapo mwaka 2023 Halmashauri ilipokea kutoka Serikali kuu viatilifu lita 700  na chandarua 12,000 ili kupambana na maambukizi ya malaria.

Pia Mratibu alisema kuwa  taasisi zisizo za serikali kama vile PMI DHIBITI MALARIA  walifanya uelimishaji kwa njia ya maigizo kuhusu ugonjwa wa Malaria kwa kata 4 ndani ya Halmashauri na taasisi ya  ROTARY CLUB OF KCMC waliweza kufanya mafunzo kwa wahudumu wa Afya ngazi ya jamii kuhusu Ugonjwa wa Malaria na kugawa baiskeli 20 kwa wahudumu wa afya ngazi ya jamii na kugawa vyandarua 1000 kwa Halmashauri kwa ajili makundi maalumu(watoto chini ya miaka 5, wajawazito, wazee na walemavu).

Idara ya Afya itaendelea kufanya kampeni za uhamasishaji katika ngazi  ya vijiji na vitongoji kuhusu usafi wa mazingira ili kuondoa mazalia ya mbu, matumizi sahihi ya  chandarua, sio kila homa ni malaria nenda kapime na  kuwashauri wajawazito kuwahi kiliniki na kupata dawa kinga za malaria.

Mwisho ili kufikia lengo la Zero Malaria ifikapo mwaka 2030 ni lazima wananchi waunge mkono juhudi zinazofanywa na Serikali, ZIRO MALARIA INAANZA NA MIMI NACHUKUA HATUA KUITOKOMEZA.MTAMA BILA MALARIA INAWEZEKANA.