KAIMU MKURUGENZI WA HALMASHAURI YA MTAMA AONGOZA KAMATI YA MAAFA KUTOA MSAADA WA CHAKULA KWA WAATHIRIKA WA MAFURIKO MTAMA.

Posted on: March 14th, 2024

Kaimu Mkurugenzi wa Halmashauri ya Wilaya ya Mtama Ndugu Mbilango leo tarehe 14 machi 2024 ameiongoza kamati ya maafa ya Halmashauri Kwa lengo la kutoa msaada wa chakula ikiwa ni unga kilo 425 na maharage kilo 188 kwa waathirika wa mafuriko katika kata ya Mtama.

Aidha Kaimu Mkurugenzi aliwapa pole wahanga hao na kusema Kuwa Serikali inaendelea kujitahidi Kwa hali na mali ili kuhakikisha ina punguza maumivu kwa waathirika hao pamoja na kutoa misaada ya mara kwa mara kama vile vyakula na magodoro.

Pia Mratibu wa maafa Ndugu Ismaili Mbani aliwataka wananchi kujitahidi kupanda mazao ya muda mfupi kama vile viazi, kunde na mahindi ya muda mfupi hasa katika maeneo yaliyoinuka ili kuepukana na janga la njaa kwani mazao mengi yameharibiwa na mafuriko hayo.

Vilevile Diwani wa kata hiyo Mheshimiwa Maria Nyale kwa niaba ya wananchi ameishukuru Serikali ya Jamhuri ya Muungano wa Tanzania na viongozi wa Halmashauri Kwa kusikia kilio cha wanamtama na ameiomba Serikali kuendelea kutoa misaada na kuwajali Wananchi wenye uhitaji hasa wahanga hao wa mafuriko, Na mwisho alipokea vyakula hivyo kwa niaba ya Mwenyekiti wa Halmashauri ya Wilaya ya Mtama.