IDARA YA AFYA YATOA MAFUNZO YA UGAWAJI DAWA KWA MAGONJWA YALIYOKUWA HAYAPEWI KIPAUMBELE.

Posted on: July 9th, 2021

Mafunzo hayo yametolewa leo tarehe 09 Julai 2021 katika shule ya msingi Mtama ambapo walioshiriki wa Mafunzo hayo ni wakuu wa shule za msingi, maafisa elimu kata, walimu wa afya pamoja na wahudumu wa afya kutoka katika zahanati na vituo mbalimbali.

Mwezeshaji wa mafunzo hayo  mama Sophia Chinjala ambaye ni Mratibu wa afya wilaya-mashuleni amesema kuwa  lengo la serikali kuanzisha mpango huo wa kudhibiti magonjwa hayo  ni pamoja na kupunguza maambukizi kutoka kwa mtu mmoja kwenda kwa mwingine, kuua vimelea vya magonjwa hayo, kupunguza magonjwa ya ngozi , kufanya watoto wakue vizuri hivyo basi ni muhimu kuhakikisha ugawaji na matumizi ya dawa hizo ni sahihi. Aidha Mratibu huyo ametoa wito kwa wagawaji wa dawa hizo kuwa makini  wakati wa zoezi hilo na  kuhakikisha  wanafunzi wanawapatia chakula kabla ya zoezi la ugawaji dawa halijaanza pia amewataka washiriki wote wa mafunzo hayo kuwa mabalozi wazuri kwa jamii ili kuondoa dhana potofu miongoni mwao dhidi ya dawa hizo.

Zoezi hilo linatarajiwa kuanza tarehe 12 Julai 2021 huku walengwa wakiwa ni wanafunzi wa shule za msingi walioandikishwa na wasiosndikishwa kuanzia umri wa miaka mitano hadi 14. Jumla ya shule za msingi 79 katika halmashauri ya  Wilaya ya Mtama zitaendesha zoezi hilo.

Zoezi la ugawaji dawa hufanyika kila mwaka chini ya Mpango wa Taifa wa Kutokomeza Magonjwa Yasiyopewa Kipaumbele  (NTD).