DED MTAMA AENDELEA KUKUTANA NA WATUMISHI KUTOKA IDARA MBALIMBALI

Posted on: October 12th, 2021

Mkurugenzi Mtendaji wa Halmashauri ya Wilaya ya Mtama Ndg. George Emmanuel Mbilinyi amefanya kikao kazi kilichofanyika tarehe 12/10/2021 kwenye Ukumbi wa Mikutano na wajumbe wa CHMT pamoja na  baadhi ya Waganga Wafawidhi wa vituo na zahanati zote ndani ya Halmashauri.

Kikao kililenga kupeana maelekezo na miongozo ya utendaji kazi ikiwa ni mikakati ya Mkurugenzi huyo kujadili kwa pamoja na watumishi kutoka katika Idara mbalimbali ili kutengeneza timu itakayoleta mabadiliko na maendeleo ya Halmashauri na Taifa kwa ujumla.

Ndg. Mbilinyi amesisitiza uwajibikaji na uadilifu katika maeneo ya kazi kwa kuzingatia nidhamu pamoja na uongozi bora." Zama zimebadilika tuache kufanya kazi kwa mazoea na  tukafanye kazi tuwatumikie wananchi". Na kuongeza " kuanzia leo jitathimini, badilika mimi nahitaji matokeo ya kazi tunazofanya" Alisema Mkurugenzi. Sambamba na hilo ametoa wito kwa wajumbe kushiriki kwa pamoja katika kuinua mapato ya ndani kwa kubuni miradi mbalimbali kwenye vituo vyao vya kazi.

Kwa niaba ya wajumbe wa kikao hicho, Mganga Mkuu wa  Halmashauri ya Wilaya ya Mtama Dkt. Dismas Masulubu amemshukuru Mkurugenzi kwa kutenga muda na kutoa maelekezo, nasaha pamoja na ushauri ili kutoa huduma bora kwa wananchi. Lakini pia  amesisitiza umakini katika matumizi pamoja na utunzaji wa dawa katika vituo mbalimbali  vya kutolea huduma za Afya vilivyopo kwenye Halmashauri hiyo.

Ikumbukwe kuwa, kwenye hotuba yake ya kwanza ya tarehe  11/08/2021 mara baada ya kuripoti katika kituo chake cha kazi Ndg. Mbilinyi  aliahidi kuzungumza na watumishi kulingana na Idara zao na huu ni utekelezaji wa ahadi zake.

Wajumbe Idara ya Afya wakiwa kwenye kikao hicho.